Әдебиет - ұлттың жаны. Ұлттық сана, тағдыр, жан жүйесі - көркемөнердің басты тақырыбы. Таптық жік арқылы әдебиет жасалмайды...
Жүсіпбек Аймауытұлы
Басты бет
Әдеби үдеріс
Жүсіп Баласағұнидің ақындық туралы айтқандары

01.06.2018 790

Жүсіп Баласағұнидің ақындық туралы айтқандары

БӘЙІТТЕР

Жазған кітап, сөйлеген сөздеріммен

Екі дүниені ұстауды көздедім мен.

3297ef1d41b7224bf72d8ebc8005360f.jpg

***

Көкірегімде шындықтың шамын жақты,

Тіл безесем – сөздерім жалын шашты.

***

Көңіл берді, көз, ақыл, білім берді,

Сөз айтуға жаратты тілімді енді.

***

Тілмен адам өң береді сөзіне,

Жақсы сөзбен нұр береді өңіне!

***

Сөз, өсиет – мұра өліден тіріге,

Мирас тұтса – пайда өзіне, діліне!

***

Тілді күтіп бақсаң – аман басың да,

Сөзді қысқа қылсаң – ұзақ жасың да!

***

Күллі сөзді жина – ақылға сыймайды,

Керек сөзді айтады тіл, тыймайды!

***

Таяқ еттен, сөз сүйектен өтеді,

Сөз қалады, таяқ табы кетеді.

***

Сөз сөйлеген жаңылар һәм адасар,

Есті естісе – түзеп-оңдап, қарасар.

***

Қара жерге жасыл көктен келді сөз,

Сөзбен адам ұлы болды, енді сез!

***

Қылыш алсаң – ел, жорықты түзерсің,

Қалам алсаң – жөн-жосықты сүзерсің.

***

Кісі көркі – сөз, бұл сөздің түрі көп,

Ізгі сөзді ерді мақта – тілі өрт!

***

Сөзіңді бақ, басың кесіп алмасын,

Тіліңді бақ, тісің сынып қалмасын!

***

Біліп айтқан сөз білікті саналар,

Біліксіз сөз басыңды жеп, табалар!

***

Ащы айтты деп кінәлама ақынды,

Ащы сөздің түбі балдай татымды.

***

Шайырлар бар сөзден кесте төгуші,

Кісілерді мақтап, даттап-сөгуші.

***

Қылыштан да өткір ащы тілдері,

Қылдан нәзік ойларының іздері.

***

Ақын көңіл теңізіне батады,

Інжу, гауһар, жақұт нұрын шашады.

***

Мадақтаса – елге даңқың жайылар,

Егер сөксе – абыройдан айырар!

***

Енді ақынға біраз назар салайық,

Өлең сөзді құдірет тұтқан халайқ!

***

Олар шебер мақтауға да, даттауға,

Сөзі ыңғайлы жұрт жадына сақтауға.

***

Сәулелі сөз күндей шыққан шығыстан,

Шаштан нәзік, өткір алмас қылыштан.

***

Ұққың келсе нәзік, ұшқыр сөздерін,

Естіген әр сөздің тінін көздегін.

***

Тілімді алсаң, ақындарды ұқ әуелі,

Ұғынықты сонда әр жырдың әуені.

***

Теңіздегі лағыл, маржан – өлең де,

Таба алмайды сүңгімеген тереңге.

***

Ақын сөзі қандай үлкен жанды да,

Масқаралар халайықтың алдында.

***

Ақын сөзі – жүрегімен сенсе шын,

Көтереді бишараның еңсесін.

***

Ұлы ақын ба, әлде көптің бірі ме,

Байлама тас ешбірінің тіліне.

***

Еркін ұста, ақын жанын ұғын да,

Сыйла бәрін, көтер қайғы-мұңын да.

***

Тек шындыққа сөз бөбегін бөлесін,

Сол кезде оның пайдасын да көресің...

(«Құтты білік» кітабынан. Көне түркі тілінен аударған: Асқар Егеубаев)

Әзірлеген Асылбек Жаңбырбай


Біздің Telegram-парақшамызға жазылыңыздар!


Материалды көшіріп жариялау үшін редакцияның немесе автордың жазбаша, ауызша рұқсаты қажет және Adebiportal.kz порталына гиперсілтеме берілуі тиіс.

Мақала авторының көзқарасы редакцияның көзқарасын білдірмейді.

Авторлық құқық сақталмаған жағдайда ҚР Авторлық құқық және сабақтас құқықтар туралы заңымен қорғалады. Adebiportal@gmail.com 8(7172) 79 82 12 (ішкі – 112)

Пікір қалдыру:
Captcha

Ең көп оқылғандар