Әлем таңғаларлық қазыналарға толы, табиғаты көркем жеті құрлықтан тұрады. Олар: Азия, Еуропа, Солтүстік Америка, Оңтүстік Америка, Австралия, Африка және Антарктида. Азия жерінің кеңдігімен, мәдениетінің сан алуандығымен ерекшеленсе, Еуропа өнері мен сәулет туындылары арқасында әлемге танымал. Африка мен Оңтүстік Америка тропиктік ну ормандарымен және түрлі жан-жануарларымен қызықтырса, Солтүстік Америка барынша дамыған өркениетімен, Австралия көрікті қалаларының көптігімен белгілі. Антарктида ең суық құрлық болғанымен, адамдардың бұл құрлыққа деген қызығушылығы ешқашан кеміген емес. Суық өлкенің тыныс-тіршілігі кімді болсын қатты қызықтыратыны рас, яғни, әр құрлықтың өзіндік ерекшеліктері, артықшылықтары бар. Құрлықта орын тепкен әрбір мемлекеттің өздеріне тән мәдениеті, салт-дәстүрі, таным-түсінігі қалыптасқан. Бұл кітапта әр құрлықтың географиялық ерекшеліктері, тарихы, тағамы, адамдары, түрлі халықтардың әдет-ғұрыптары мен ұстанымдары, көркемөнер туындылары, өмір сүру дағдылары мен тілдік ерекшеліктері туралы баяндалады. Қызықты суреттермен безендірілген энциклопедия оқырманның көңілінен шығады деген үміттеміз.