Арыстардың арманы
Ықылым ерте заманнан-ақ көк түріктің тал бесігі болған Алтайға, оның ішінде Моңғол жерінде қазақтардың қайта қоныстанғанына 150 жыл толуы қарсаңында оқырманға ұсынылып отырған осынау кітап тарихи оқиларға құрылған, бір-бірімен желілес екі романнан тұрады. Алмағайып кезеңдерді бастан көп кешіп, Арқадан Алтайға, одан Қобдаға қоныс аударған қазақтардың азапқа толы көш жолы, болашақ ұрпақ тағдыры үшін жанталасқан күрес шежіресі шынайы бейнеленеді. «Арман тау» романынан бастау алып, «Арыстардың арманы» атты роман-эсседе жалғасын тапқан ел мен жер тағдыры үшін жүргізілген жансебіл күрес атадан балаға ауысып отыратын ұлы мұрат ретінде көрінеді. Абақ керей елін талай қиын-қыстау күндерден аман алып өткен Жылқышы үкірдайдың немересі – Дəлелхан Сүкірбайұлы Шығыс Түркістанның азаттығы үшін жанын пида еткен қайраткерлер қатарында мерт болды. Алаш азаттығы кеуделерінде тербеткен аяулы арыстарымыз мінген ұшақ апатының астарында талай белгісіз сыр жатыр. Кітап тағылымды тарихқа жаны құмар оқырмандар үшін қызғылықты дүниеге айналары даусыз.
