Әдебиет - ұлттың жаны. Ұлттық сана, тағдыр, жан жүйесі - көркемөнердің басты тақырыбы. Таптық жік арқылы әдебиет жасалмайды...
Жүсіпбек Аймауытұлы
Басты бет
Әдеби үдеріс
Абайдың 170 жылдығы қалай тойланады?

28.07.2015 313

Абайдың 170 жылдығы қалай тойланады?

Абай-әдебиет.jpg

Абай Құнанбайұлының 170 жылдық мерейтойына орай, Шығыс Қазақстанда бір емес, қатарынан бірнеше мерекелік шаралар өтеді. Әрбір шара қазақ жазба әдебиетінің негізін қалаған ақынның келбеті мен шығармашылығын жаңа қырынан аша түспек. Бұл жайлы сұхбат барысында ШҚО әкімінің орынбасары Жақсылық Омар мәлім еткен болатын.


Қазіргі заманғы қазақстандық қоғам үшін халық ағартушысының рухани мұрасын зерттеп, зерделей білудің маңызы зор. Абай Құнанбайұлының 170 жылдығына арналған мерекелік шаралар легі «Абай және әлемдік өркениет» атты Халықаралық ғылыми-практикалық конференциясынан бастау алады. Конференцияға шетелдік жетекші әдебиеттанушылар, философ, тарихшылар, тіл мамандары мен Абай шығармаларын әлем тілдеріне тәжімалаған шетелдік аудармашылар қатысады.

Биылғы мерейтойдың тағы бір жаңалығы, Елбасының қолдауымен, Мемлекеттік тілді дамыту қорының тапсырысымен «Абай әлемі» атты тұңғыш энциклопедиялық порталының ашылуы. Жоба аясында «Абайдың ұлы жұмбағы» атты деректі фильмінің тұсауы кесіледі. Игі бастама Мемлекет басшысы Нұрсұлтан Назарбаевқа бейбітшілікті сақтауда және дамытуда қосқан елеулі үлесі үшін табысталған әлемдік «Жібек Жолы» сыйлығының қаражатына жүзеге асырылған. Деректі фильмді түсірген «Серпер» жастар сыйлығының, Мемлекеттік «Дарын» сыйлығының лауреаты Ақберен Елгезек пен «Tengri Films» кинокомпаниясы. Жаңа туындыда көрермен-қауым Абайды жаңа қырынан тани отырып, алған білімі, шығыс тәрбиесі жайлы құнды деректермен таныса алады.


Абай атындағы театрда «Адамзаттың Абайы» атты салтанатты шарасы өтеді. Артынша дәл осы театрда көрнекті өнер майталмандарының қатысуымен концерттік бағдарлама жалғасын табады.


Мерекелік шараға мемлекет және қоғам қайраткерлері, ақындар, түркітанушылар, ғалымдар, профессорлар және Абай шығармасын аударған шетелдік жазушылар келеді.


Хәкім Абайдың 170 жылдығына арналған шаралар 7-ші тамызда Абай ауданында жалғасады. Сол жерде орналасқан этноауыл, мұражай-үйі, «Абай-Шәкәрім» мемориалдық кешені, «Еңлік-Кебек» ескерткішінде болған шара қонақтары, Мамай батыр ескерткішінің ашылу салтанатында қатысады. Сондай-ақ, бұл күні Қарауылда Қазақ күресінен Қазақстан чемпионаты, «Жорға жарыс», «Аламан бәйге», «Абай тойының бас палуаны» сынды сайыстар өтетін болады. Жоспарланған іс-шаралар «Адамзаттың бәрін сүй, бауырым деп» атты Республикалық ақындар айтысына ұласады. Аламан айтыста еліміздің әр аумағынан келген 12 үздік айтыскер қатысады. Олардың арасында Серікзат Дүйсенғазин, Сара Тоқтамысова, Айнұр Тұрсынбаева, Айбек Қалиев сынды танымал айтыскерлер бақ сынасады.


Облыс басшысы орынбасарының айтуы бойынша, мерейтой ағымдағы жылы өзінің ауқымдылығымен ғана емес, танымдылығымен де ерекшеленеді. Яғни әрбір қонақ Абайдың рухани және шығармашылық дүниесіне сапар шеге алады.


– Абай – біздің дәулетіміз ғана емес. Абайды танумен ондаған жылдар бойы әлем ғалымдары, әдебиеттанушылары мен тіл мамандары айналысып келеді. Еліміздің рухани және мәдени орталығы Семей қаласына әр елдің, діннің, тілдің және ғылым саласының өкілдері жиналады. Олардың әрбіреуі осы қалаға келе отырып, мәдени ескерткішімен, тарихымен танысу мүмкіндігіне ие болып, рухани дүниелерін байыта алады. Оның ішінде Жидебай-Бөрілі жерінде өтетін шараны айтып өтуге болады, – деді Ж. Омар.


Абай қазақтың ұлттық жазба әдебиетінің негізін қалаған ағартушы. Абайдың артында қазақ халқының алтын қазынасы 170 өлең, 56 аударма, поэма, 40 «Қара сөз» және бүгінгі күні танымал 200-ге жуық әндері мен күйлері қалған.



adebiportal.kz



Біздің Telegram-парақшамызға жазылыңыздар! Бізбен бірге болыңыз!


Материалды көшіріп жариялау үшін редакцияның немесе автордың жазбаша, ауызша рұқсаты қажет және Adebiportal.kz порталына гиперсілтеме берілуі тиіс. Авторлық құқық сақталмаған жағдайда ҚР Авторлық құқық және сабақтас құқықтар туралы заңымен қорғалады. Adebiportal@gmail.com 8(7172) 79 82 12 (ішкі – 112)

Мақала авторының көзқарасы редакцияның көзқарасын білдірмейді.


(0)
Пікір қалдыру:
Captcha

Ең көп оқылғандар