Әдебиет - ұлттың жаны. Ұлттық сана, тағдыр, жан жүйесі - көркемөнердің басты тақырыбы. Таптық жік арқылы әдебиет жасалмайды...
Жүсіпбек Аймауытұлы

Басты бет
Әдеби үдеріс
Елбасы әдебиет және өнер саласындағы мемлекеттік сыйлықтарды тапсырды

14.12.2018 808

Елбасы әдебиет және өнер саласындағы мемлекеттік сыйлықтарды тапсырды

Бүгін Ақордада Елбасы Нұрсұлтан Назарбаев ұлт рухниятын ұлықтауға сүбелі үлес қосып жүрген бірқатар танымал тұлғаларға әдебиет және өнер саласындағы мемлекеттік сыйлықтарды тапсырды.

Атап айтқанда ақын Тыныштықбек Әбдікәкімовке «Алқоңыр дүние» өлеңдер мен балладалар жинағы үшін; ақын Ақұштап Бақтыгерейқызы Бақтыгерееваға «Ана сыры» өлеңдер мен балладалар жинағы үшін, ақын Өтеген Оралбайұлы Оралбаевқа «Шуақты шақ» жыр жинағы үшін берілді.

Мұнан бөлек, Нұрсұлтан Назарбаев екі авторлық ұжымға да мемлекеттік сыйлықты тапсырды. Нақты айтқанда, Төлеубек Нығметұлы Әлпиевке, Алан Асқарұлы Бөрібаевқа, Сүндет Әбдірахманұлы Байғожинге, «Астана Опера» мемлекеттік опера және балет театры» коммерциялық емес акционерлік қоғамының шығармашылық ұжымына қатысушыларға «Абай» операсы (Л. Хамиди, А. Жұбанов) үшін; Ақан Қарғамбайұлы Сатаевқа, Әлия Нұрсұлтанқызы Назарбаеваға, Тимур Қазбекұлы Жақсылықовқа, Алтынай Бауыржанқызы Нөгербекке, Әділ Ералыұлы Ахметовке «Анаға апарар жол» толықметрлі көркем фильмі үшін мемлекеттік сыйлық тапсырылды.

«Нұрсұлтан Әбішұлы, Ұлы даланың еркін даусын төрткүл әлемге естірту дәуірі Сіздей ұлға бұйырғаны тағдыр сыйы екені рас. Қасиетті Атамекеннің өткен рухын жаңғыртып, жас ұрпақ санасында жеті қасиетін қайтадан есіне салып, парасатпен, ұлылықпен, саясаткерлікпен жаңа ғасыр көшіне жалғап отырған еңбегіңіз әлемге аян. Өз басым атқа мініп, домбыра тартып өскен сезімтал жүрегіңізге қайран қалатынымды жасыра алмаймын. Ерекше адамсыз, өнері ұлы болмай мемлекет ұлы болмайды. Кітап оқылмайды деген бекер сөз. Қазақ әдебиетінің жауһарларының әлемнің бүгінде алты тіліне аударыла бастауы, әлем әдебиетінің озық үлгілерінің қазақ тіліне аударылып келуі соған басталған ұлы қадам деп білеміз. Еркіндіктің көк туын қыран мінез қайсарлығыңызбен биіктете береріңізге сенімдіміз және тілекшіміз», – деді Елбасы қолынан мемлекеттік сыйлық алған Ақұштап Бақтыгереева.

Қаламгерлер мен өнер қайраткерін марапаттау – 16 желтоқсан – Ел Тәуелсіздігі күніне орай өткен игі шаралардың бірі. Алдағы уақытта еңбегі еленген тұлғалардың шығармалары жан-жақты насихатталмақ.


Біздің Telegram-парақшамызға жазылыңыздар! Бізбен бірге болыңыз!


Материалды көшіріп жариялау үшін редакцияның немесе автордың жазбаша, ауызша рұқсаты қажет және Adebiportal.kz порталына гиперсілтеме берілуі тиіс. Авторлық құқық сақталмаған жағдайда ҚР Авторлық құқық және сабақтас құқықтар туралы заңымен қорғалады. Adebiportal@gmail.com 8(7172) 79 82 12 (ішкі – 112)

Мақала авторының көзқарасы редакцияның көзқарасын білдірмейді.

Көп оқылғандар