Әдебиет - ұлттың жаны. Ұлттық сана, тағдыр, жан жүйесі - көркемөнердің басты тақырыбы. Таптық жік арқылы әдебиет жасалмайды...
Жүсіпбек Аймауытұлы

Басты бет
Әдеби үдеріс
Сол - менмін, ҒАЛАМ заңын бұзған ақын

10.10.2017 3677

Сол - менмін, ҒАЛАМ заңын бұзған ақын

Бала күнгі өлең


Мөлт еткен мөлдір көркің
Мүлтіксіз қалқам, ерен
Түсіме сен кірген түн,
Оянбай қалсам деп ем.
Әттең таң атып...

Жазылмас пәк сезіммен,
Қарасар шақ та-бақыт.
Жолыққан сәтте өзіңмен,
Қалса ғой тоқтап уақыт.
Әттең сағатым...

Самғатып айды аспанға,
Ғарыштап тілек деген.
Саусақтар айқасқанда,
Жарылса жүрек деп ем!
Әттең тағатым...

Бөктерлер гүл атқанда,
Келер деп елеңдегем.
Сен маған тіл қатқанда,
Тіл тартпай неге өлмегем?!
Әттең бала күн...




...Бақытты ғой туа салып өлгендер...

(Хафиз)



Үш-ақ күндік ғұмыр-шарана,
Су бетіндегі сыланған айдай.
Құрлық төсін жәйлаған
Ғұмырдария.
Мойны жұмыр өмір-шағала.
Қыл мойынынан бұланған тайдай.
Пенделер
өзін көрер тұсаулы айнадан.

Жанымен ана жылаған
Тамшыдай жаны тамып бір кетті,
сәбидің...
Тербелмей бесік құбадан,
Туа сап сәби қамыт тербетті,
Қамыт тербепті
пәниде...

Қалшылдап құрып,
ақ кірседағы шашыңа
Жалғанды сөкпе
барлығың.
Туылмай тұрып
жазылған құлпы тасыңа
Тағдырың!

Бағбансыз бассыз қалған дүние!
Етегін түріп тысталған
Бес күндік дейтін жалған дүние
Үш күндік болып қысқарған...


***
Әр бір көздің ар жағында ,
Таусылмастай әлем бар.
Қарқылдаған қарғаның да,
Дауысында әуен бар.

Ана сабар, бұла ұлдың да,
Кеудесінде дүрсіл бар.
Уын төккен жыланның да,
Ысылында бір сыр бар.

Тау ағызған тасқынның да,
Тасуында ғұмыр бар.
Жауға шапқан жас Ғұнның да,
Бас білмейтін дүбірі бар.

Үш-ақ күндік көбелекте
Ғұмыр бойғы бақыт бар.
Киік түбіт кебенекте,
Керегедей жаһұт бар.

Болат қанат қарт қыранның,
Құз жартаста құны бар.
Өмір дейтін ШАТТЫҚ әннің,
Мәтінінің мұңы бар.


Біз келгенбіз бір көзіміз жұмулы

Ақ киізбен хан көтеріп қастерлеп,
Шағалақша шуылына басатын.
Ораза ұстап тиылса әрең "сәскеде"
Ақшам кіре арда көңіл тасатын.

Қиған қамыс секілденген құлағы
Жас құлынның тәй - тәй басқан ізіндей.
Біздің тірлік екі-ақ сөзден тұрады.
Келу, кету-
Өмірдің қос көзіндей.

...Жылап туып үйрене алмай күлуді,
Біз келгенбіз бір көзіміз жұмулы...

Соңғы сәре



Иесіне еркелеген бұралқы күшіктей,
Сүйкімді уақыт, салпаң құлақты.
...Көк аязда адам өліп үсіктен,
Көктемгі жел көк атанды құлатты...
(Әлі ойлаймыз өлім ол жыра-а-ақта.)

Қорылына үй қозғалған ұйқыда,
Жарты өлген тәніміз.
Тағдыр атты тас кененің сиқына,
Тоналыпты қанымыз!
Азайыпты санымыз.

Тәлтіректеп жаңа туған құлындай
Қалш-құлш етер аяқта.
Қыран тағдыр үзер түлкі жұлынды,
Көбік күні, саятта.
Сағат, минут-ай, апта.

Өлім иісі бұрқыраған ноқтамен
Бұғауланған қара бас.
Бал қызбенен қыдырушы ем бақта мен-
Дәуірлермен аралас.
(Махабатқа шала мас...)

...Ақсүмбе ай жанымызды түлетті,
Соңғы сәре таң асырды жүректі...

Сол - менмін



Мен өлең жазар едім...
пасықтардың көзінен қан ағатын
Жасықтар өзін өзі таба алатын.
Бұйрығынсыз шыбында шаға алмаған
Паш ететін Құдайдың Ғаламатын.

Мен өлең жазар едім...
Ғашықтарға ұялшақ, тіл боларлық,
Аппақ қардың астынан гүл боратып.
Алты құрлық ақыны мекендеген,
Поэзия елінде мір* боларлық.

Мен өлең жазар едім...
Өлі туған рухқа жан бітіріп
Шапақтай шуақ шашқан таңды тіліп.
Таланттар оқитын таңдай қағып
Тасырларың оқитын қан жұтынып.

Мен өлең жазар едім...
Нәрестені пенде емес адам қылар
Жалғыз сөзден жалқы әлем санамды ұғар.
Замананың құстырып запыранын
Әр тармаққа сыйғызар адамдық-ар.

Мен өлең жазар едім...
Көктемгі гүл ететін күз наласын,
Күн айдан,
ал ай күннен қызғанатын.
Ғарышты ғадетінен жаңылдырып,
Сол менмін ҒАЛАМ заңын бұзған ақын.

*Мір - мэр


***


Сен қасымда жүрген шақта айдай боп...
Түнгі аспанға түстес едім,
Сүттей жарық келіскен.
Көз қырыма түспес еді
Пейіштік пәк періштең.

Сен қасымда жүрген шақта күндей боп...
Жазғы дала заңдас едім,
Жадыраған түрленіп.
Қолын тіпті алмас едім
Қор қыздардың кіл көрік.

Сен қасымда жүрген шақта асқақ боп...

Сетінемес сезім дейтін,
Бұланайдан сәл биік.
Көзге тіпті көрінбейтін.
Керім қыздар кері киік,

Сен кеткенде дала мұңды аспан күңгірт түнектей
...Енді міне қаламымды
Мұңға малып күнелттім

Сен жанымда жүре берші-
жанды жері жүректің!

Бақберген ДАРИҒА


Біздің Telegram-парақшамызға жазылыңыздар! Бізбен бірге болыңыз!


Материалды көшіріп жариялау үшін редакцияның немесе автордың жазбаша, ауызша рұқсаты қажет және Adebiportal.kz порталына гиперсілтеме берілуі тиіс. Авторлық құқық сақталмаған жағдайда ҚР Авторлық құқық және сабақтас құқықтар туралы заңымен қорғалады. adebiportal@gmail.com 8(7172) 57 60 13 (ішкі - 1060)

Мақала авторының көзқарасы редакцияның көзқарасын білдірмейді.


Көп оқылғандар