Повесть, пьеса, ертегілер

Ақын, жазушы, драматург, жыршы, манасшы, Қазақстанның еңбек сіңірген қайраткері Баянғали Әлімжановтың Шығармалар жинағының 26 - томына прозалық шығармалары, пьесалары, балаларға арналған туындылары топтастырылған. Орыс тілінде жазылған «Тамшы» повесінің қазақша аудармасы берілген. «Тамшы тас жарады», - дейді халық. Адамның тас төбесінен үздіксіз су тамшылатып қойса, жынданып кетеді екен. Адамды басынбау керек. Ашындырып алсаң, зардабы ауыр болады. Бұл шағын дүниенің тамыры терең, айтары астарлы. «Құлеке батыр», «Әлти әулетінің тағдыры», «Смағұл ішкен у» драмалары халқымыздың басынан өткен сан қилы тарихты, ардақты тұлғалардың тағдырын суреттейді. Ал «Ойсыз қадам» драмасы бүгінгі жастардың арасында болып қалатын қақтығыс, жанжалдардың мағынасыздығын, зардабын көрсете отырып, үлкен ойларды қозғайды. Сонымен бірге бұл томға балаларға арналған «Мейірімді Асқар» ертегісінің 2-3 бөлімі, шағын әңгімелер де енген. Және «Мейірімді Асқар» ертегісінің үш бөлімі де өзбек тілінде жарияланып отыр.