Шындық шырағы

Ұзақ жылдар есімі де, еңбегі де елеп-ескерусіз, тар қапаста ұсталып келген арыстарымыздың бірі — Міржақып Дулатов. Қазіргі уақытта М.Дулатов туралы біршама зерттеулер жазылғанымен, ол кісінің өмірі мен қызметі көпшілік қауымға әлі де беймәлім. Осы орайда алтынның сынығы Жақаңның қызы — Гүлнар апайдың әкесі туралы жазған естеліктері — жұмбағы мен қалтарысы мол ел ағасының өмір белестері туралы оқырман ұғымын толықтырып, жас ұрпақтың көңіл көкжиегін кеңейте түсері сөзсіз.

Автор әкесінің бойындағы азаматтық ажарын, мінез-құлқы мен кейбір оқиғаларға қатысын, өз ортасымен қарым-қатынасын жүйелі түрде баяндаған.

Сонымен бірге А.Байтұрсынов, Ә.Бөкейханов, Ж.Аймауытов, М.Жұмабаев, С.Қадірбаев, А.Юсупов, Қ.Кемеңгеров және т.б. оқырманға белгілі Алаш арыстарының өмірі мен қызметтері туралы шынайы естеліктер молынан кездеседі.

Бұл кітап 1998 жылы Г.Дулатованың ұлы — Е.Ә.Сатыбалдиевтің жеке бастамасымен 2 том болып аз таралыммен басылған. Енді 2 том біріктіріліп, толықтырылып, өңделіп бір кітап болып шығып отыр.

Кітап гуманитарлық сала мамандары мен көпшілік оқырмандарға арналған.