Сен мені бір күн іздесең,

Ойға алып жақындығымды.

Мен туған көз сал күзге сен,

Мойында ақындығымды.

Сырғалы күзді   сүй мендей,

 Сыңғырлы сырлы баққа бар.

 Сүй  , сосын мені сүйгендей,

 Сезімді сонау ақтап  ал.

 Ақтап ал  ,  сұлу шақтарды,

  Кеудеңнің тында лүпілін.

 Періште пейіл ақ таңды,

  Сүй мендей , жырла,  үкілім.

 Шарқ ұрып шарла күз елін,

 Ақтап ал күйін қараша.

Жанымнан жапырақ үзермін,

 Сонда мен  күзге таласа...

***

Алмасып, таппайды екен күн дамылың ,

Кеудемде тыншымайды мұң дауылым .

Сызылта салып әнге сағынышты,

Тұсынан өтіп барам құмды ауылдың.

Топ үйрек дарияны айналады,

Кез қайда серттесіп , сөз байлағалы.

Неше күз кеуіп көңіл кенезесі ,

 Оралып неше көктем жайнағалы...

Өмір солай дегенін алады да,

Өкініш жанға батып барады ма,

Жақын кеп, жалт бұрылған қайран қалқам,

Өкпе айтар жайың бар ма налалыға ...

                        ***

Кеуілдің  де кеміп арманы,

 Көшіне ілестім күйбеннің.

  Күндерде не бар алдағы,

   Бәрі өткен -  қалап, сүйгенім.

   Толқындар   менің егізім,

  Тулап та толқып  ағады –ай...

Күңгірт ой  кештім  теңізің,

   Жарқабақтарды жағалай...

  Тілегі  тозды- ау  жүректің,

Әуелеп ұшпай арманы.

Кеміді -ау күші білектің,

Не күтем күннен алдағы?

 Сайрандап жүрген дәуренім,

 Сарыала мұңды күздейін

  Сәлемі  сүйген сәулемнің,

 Сағымға сінген іздейін.

                          ***

Таң ата.... шөп – шөп деп бір дыбыс...

Жастықтан жұлып ап басымды,

Таңғала  тындадым... үр сүйіс,

 Моншақтар, моншақтар  шашылды.

  Бадана – бадана тамшылар,

  Шатырлар  шатырлап үндесті.

  Бір – бірін қуалап, қамшылап,

  Ел  де сел шығарды күллі есті.

 Құдай – ау,  күй  ғой бұл, күй жаңа,

Домбыра дала ғой , шалқыма.

Осылай шертілер күй ғана,

Осылай шалқып та алқына.