Роза Мұқанова: «Әдебиет порталы» тәуелсіз ойдың еркіндігін тудырды

«Әдебиет порталы» тәуелсіз ойдың еркіндігін тудырды. Қаламгерлер үшін заманына сай бұрқ-бұрқ қайнап еркін көсіліп ағатын таза бұлақтың бастауы қажет еді. Өзін-өзі танытқысы келетін ақын-жазушы күш сынасып, бәйгеге түсті. Бірі алыстан беу-беулеп бой көрсетсе, бірі шаң арасынан қылаң беріп оза шабатындай. Тәуелсіз елдің тәуелсіз әдебиетінің арынын аңғартады. Қуанып, елегзіп, тақымыңды қысып, мойыныңды соза түсесің. Әлемді аузына қарататын бір құбылыс төбе көрсететіндей сарыласың. Түбі келер, түбі көрінер. Сол құдіреттің де бет-бейнесін танытатын «Әдебиет порталы» болар. Үш жылға жаңа толып отырған «Әдебиет порталын» сәби дей алмаспыз. «Түбі осынымнан бірдеңе шығар» деп үміт күткен ата-анадай мейіріммен ақ тілек тілеп, тер мүңкіген ойын баласына үлкен арман жүктейміз.