Жарылқап Бейсенбайұлы

Жарылқап Бейсенбайұлы 1947 жылы 10 сәуірде Түркістан облысы, Отырар ауданы, Молыке Шойманов ауылында туған. Қазақ мемлекеттік университетінің (қазіргі ҚазҰУ) филология факультетін бітірген (1969). 1969–1990 жылдары «Лениншіл жас» (қазіргі «Жас Алаш») газетінде әдеби қызметкер, бөлім меңгерушісі, жауапты хатшы болып істеді. 1990–1997 жылдары «Ана тілі» газетінің тұңғыш Бас редакторы, 1997 жылдың соңынан Қазақ ақпарат агенттігі (бұрынғы ҚазТАГ) директорының орынбасары, 2002 жылдан осы агенттік негізінде құрылған «ҚазАқпарат» Ұлттық компаниясы АҚ-ы Қазақ редакциясының бас редакторы, 2014–2017 жылдары "Мәдени мұра"–"Культурное наследие" жұрналының бас редакторы қызметтерін атқарды.

«Шоқан ізімен» (1977), «Буырқанған бояулар» (1981), «Әдеп әлемі» (1982), «Жасын-тағдыр жарқылы» (1987), «Қазақ шежіресі» (1994), «Арғы түрктер ақиқатының ізімен» (2006) атты деректі-танымдық, эссе, зерттеу кітаптарының, "Шоқан" тарихи-ғұмырнамалық роман-эссесінің (2009) авторы. Бұл роман-эссе 2015 жылы орысшаға "Чокан Валиханов" (историко-биографическое повествование) деген атаумен аударылып, оның таныстырылымы сол жылдың соңында Мәскеу қаласындағы Орыс Географиялық қоғамының штаб-пәтерінде өтті. Сонымен бірге 2015 жылы Астанадағы Түрк академиясының жобасы бойынша "Орталық Азиядағы арғытүрк сипатты мәдениеттер: этнотектік аспектілер" монографиясы жарық көрді. 2017 жылы Мемлекеттік бағдарлама бойынша "Ұлы Даланың ежелгі тарихының этномәдени төркіндері" атты көрнекі безендірілген ғылыми-көпшілік зерттеу еңбегі оқырман назарына ұсынылды. 2022 жылы таңдамалы бес томдық шығармалар жинағы жарық көрді.

Қазақстан жастар одағы сыйлығының лауреаты (1982), Қазақстан Жазушылар одағының мүшесі (1989), филология ғылымының кандидаты.

АВТОРДЫҢ ЕҢБЕКТЕРІ МЫНА СІЛТЕМЕДЕ: https://kazneb.kz/