Баят Жанатұлы

Жанатұлы Баят (1935-2014)
1935 жылы 1 қыркүйекте Монғолияның Баян-Өлгий аймағы Қызыл қайың ауданы, Үш Ойғыр аулында туған.

Орта мектепті аяқтаған соң Абай атындағы ҚазПИ-ге түсіп 1961 жылы бітірген. Баян-Өлгий аймағы Жастар одағының бірінші хатшысы, М.Зайсанов атындағы Қызылқайың орта мектебінің директоры, Қызыл қайың аудандық партия комитетінің хатшысы қызметтерін атқарған.

1960 жылдан бастап әдебиетпен шұғылданған. Драма жанрында өнімді еңбек еткен. 1976 жылы «Кестелі орамал», 1980 жылы «Меруерт», 1984 жылы «Қиян асулар» атты әңгімелер жинақтары шыққан. «Мен де кінәлімін», «Солдат сыры», «Айырылмас құшақ», «Айдарға тағылған айдар», «Біздің үйленуіміз», «Бажалар бас тырнаспайды» т.б. драмалық шығармалары Баян-Өлгий аймақтық театрда сахналанған.

1992 жылы тарихи Отаны Қазақстанға көшіп келіп, Көкшетау облысы Уәлиханов ауданы, Советское кеңшарындағы орта мектепте мұғалім, 1993 жылдан 1997 жылға дейін Көкшетау облыстық «Көкшетау» газетінде тілші болған.

Монғолияның «Алтын жұлдыз» орденімен, «Еңбек даңқы» және «Жастардың алтын медалімен сыйланған.