Нұрлан Қабдайұлы 1983 жылы 22 қыркүйекте Монғолияның Баян-Өлгей қаласында туған. 1993 жылы әке-шешесінің етегінен ұстап атамекен – Қазақстанға қоныс аударған. Балалық шағы Қарағанды облысының Нұра ауданына қарасты Жарасбай ауылында өтті. 2002-2006 жылдары әл-Фараби атындағы Қазақ Ұлттық университетінің журналистика факултетінде оқыған.
Еңбекке ерте араласқан. 2003-2008 жылдары ҚР Ішкі істер министрлігіне қарасты «Сақшы» газетінде, республикалық «Азамат KZ», «Ақ жол Қазақстан», «Дала мен қала», «Қазақ әдебиеті» басылымдарында тілші, Қазақ радиосында редактор-шолушы болды. 2008-2018 жылдары «Хабар» телеарнасының сценарист-редакторы. 2018 жылдың қыркүйек айынан «Әдебиет порталы» интернет-жобасының бас редакторы.
Жазған-сызған бірдеңелері «Қазақ әдебиеті» газеті мен «Жұлдыз» журналына, Adebiportal.kz, Madeniportal.kz, Abai.kz интернет сайттарына жарияланып тұратын. Әңгімелері Мәскеудегі «Қазақстан-Ресей» әдеби альманағына екі мәрте басылған. Алғашқысында қатты қуанған. Және Мәскеудегі оқырман үшін (өзі осылай деп қиялдайды) Ресейде шыққан жинаққа қазақ тілінде басылғанына таң қалған. Екіншісі жеңіл өтті.
Бір жылдары «Ауылым – алтын тұғырым», «Семсер» әдеби бәйгелерінен жүлде алғаны бар. Сол жолы кредиттің екі-үш айын алдын-ала артығымен төлеп жырғап қалғанын әлі күнге жыр қылады. Өзі бірдеңе-сірдеңе жазған болып, қалған баспа табағын аудармамен толтырып жүріп зорға дегенде «Сұр әңгіме» прозалық кітап шығарған. Соның арқасында Қазақстан жазушылар одағының мүшелігіне қабылданды. Ол аздай ҚР Ақпарат саласының үздігі.
