Асқар Тоқмағамбетов

Асқар Тоқмағамбетов – 1905 жылы Қызылорда облысы, Тереңөзек ауданында дүниеге келген. Алғашқы білімді ауыл молдасынан алған. 1983 жылы 21 тамызда дүниеден өтті.

1924–1926 жж. Ташкенттегі политехникумда оқыған. «Лениншіл жас» (қазіргі «Жас Алаш»), «Социалистік Қазақстан» (қазіргі «Егемен Қазақстан») газеттерінің редакциясында істеген. 1932 жылы Мәскеу Журналистер институтын бітірген. Ұлы Отан соғысына қатысқан. «Лениншіл жас» (1927–1930), «Ленин жолы», (1933–1934), «Қазақ әдебиеті» (1934–1935), «Социалистік Қазақстан» (1937–1944) газеттері мен «Ара» журналында қызмет істеді. Қазақстан Жазушылар одағының Шымкент, Қызылорда облыстары бойынша жауапты хатшысы болды.

1924 жылы «Ленин суретіне» деген тұңғыш өлеңі «Еңбекші қазақ» газетінде басылған. 1928 жылдан бастап өлеңдері мен поэмалары, очерктері мен фельетондары сан рет жеке кітап болып басылып шықты. «Екі заң», «Сайлау», «Алдар көсе», «Бір семья» деген пьесалар жазды. Әсіресе мысал жанрына мол қалам тартқан.Үш мәрте Еңбек Қызыл Ту және І дәрежелі Отан соғысы, Октябрь Революциясы ордендерімен және медальдармен, бірнеше рет Қазақ КСР Жоғарғы Кеңесінің Құрмет Грамотасымен марапатталған.

Шығармалары: Таңдамалы шығармалары. Өлеңдер, поэмалар. Алғы сөз жазған Ғ.Мүсірепов. А., ҚМКӘБ, 1956; Екі томдық. Өлеңдер, поэмалар, сықақтар және мысалдар. А., ҚМКӘБ, 1962; Тырналар, сұлу тырналар. Өлеңдер мен сықақтар. А., «Жазушы», 1965; Алтын жапырақтар. Таңдамалы сықақ өлеңдер мен дастандар. А., «Жазушы», 1975; Төрт томдық шығармалар жинағы. А., «Жазушы», 1982–1984.