Ермұханбет Қуандық

Желтоқсан көтерілісінің қаһарманы Қуандық Ермұханбет Әбдікерімұлы 1963 жылдың 27- қаңтарында Түркістан облысы Ордабасы ауданының Ықылас Темір аулында дүниеге келген. 1971-1981 жылдары орта мектепте оқыған.
Әскер борышын 1981-1983 жылдары өтеп, арнайы жолдамамен,1984 жылы ҚазМУ-дың тарих факультетіне түседі.
1986 жылы студенттердің құрылыс отряды құрамында, Чернобыльде болып, белсенді интернационалдық көмек көрсетеді. 1986 жылғы Желтоқсан көтерілісін ұйымдастырушының бірі ретінде және Алматы алаңындағы қақтығыстар ортасында болғаны үшін 5 жыл бас бостандығынан айырылады. Қарлагтың қатаң тәртіптегі еңбекпен түзеу колониясына айдалады... Бастапқы үкім 2 жылға қысқартылып, 1989 жылдың 3-ақпан күні, Е. Қуандық мерзімінен бұрын бостандық алған соң, оқуына қайта қабылданып, 1992 жылы тарих және саясаттану маманы дипломын алып шығады.
Е.Қуандық «1986 жылғы Желтоқсан көтерілісін тексеру жөніндегі Парламенттік Комиссияның» құрамында, оның жектекшісі М.Шахановтың қоғамдық көмекшісі бола жүріп, жазықсыз құрбандарды анықтауға сүбелі үлес қосты. Басынан өткен Желтоқсан уақиғасына байланысты басынан өткен шынайы уақиғалар негізінде “1 жыл 11 ай 3 күн” атты деректі кітап жазып шыққан.

2000 жылдан бастап кәсіпкерлікпен шұғылданады.