Жұмабек Кенжалин

Жұмабек Кенжалин (1954 – 2018) 30 желтоқсанда Қостанай облысы Амангелді ауданы Жданов атындағы ұжымшарда туған. Әскер қатарында қызмет етті, шаруашылықтарда жұмыс істеді.

1981 жылы Қазақ мемлекеттік университетін тамамдаған соң, «Социалистік Қазақстан» («Егемен Қазақстан») газетінде тілші, бөлім меңгерушісі, 1986-88 жж. «Білім және еңбек» («Зерде») журналында жауапты хатшы, бас редактордың міндетін атқарушы болды. 1990 жылдан «Халық кеңесі» газеті бас редакторының орынбасары, бірінші орынбасары, 1994 жылдың қаңтарына дейін осы басылымның бас редакторы, 1996-97 жж. «Ақиқат» журналының бас редакторы, 1997-99 жж. «Қазақ әдебиеті» газетінің бас редакторы, 1999-2006 жж. «Қазақ газеттері» жабық акционерлік қоғамының президенті, «Қазақ газеттері» ЖШС- ның бас директоры, «Ана тілі» газетінің бас редакторы, 2006-09 жж. «Ақиқат» журналының бас редакторы, 2009 жылдың ақпанынан «Қазақ газеттері» ЖШС-нің бас директоры – редакторлар кеңесінің төрағасы болды. Қазақстан Үкіметі жанындағы Мемлекеттік терминологиялық комиссия мүшесі, ХVІІ шақырылған халық депутаттары Алматы қалалық Кеңесінің депутаты болып сайланды. Саяси ғылымдарының кандидаты (2004).

«Желкілдеп өскен құрақтай», (1988, «Өнер»), «Шындықты шырақ етіп ұстаңыз» (1998, «Қазақстан»), «Ұлт рухын ұлықтаған ұрпақпыз» (2005, «Өлке») деп аталатын деректі әңгімелер мен эсселер кітаптарының авторы.

Қазақстан Журналистер одағы сыйлығының лауреаты (1984), ҚР Президент сыйлығының иегері (2006), ҚР Мәдениет және ақпарат министрлігінің «Мәдениет қайраткері» төсбелгісімен марапатталған (2004). Қазақстан Журналистер академиясының толық мүшесі-академигі (2001).