Әбіш Кекілбаев «Шыңырау» арқылы әрқайсымызға өз ішімізді «қаздырып» отыр

15 маусым 2026 3835

«Әдебиет порталының» «Жансусар» жобасына «Шырақ» кітап клубының қыз-жігіттері келіп, Әбіш Кекілбаевтың «Шыңырауын» талдады. Клуб мүшелерінің символға толы, адамның ішкі әлемі, керек десеңіз шегінен асып кеткен амбициясы жайлы айтатын философиялық шығарманы таңдауларының өзі қандай! «Шырақ» Астанадағы Алтынсарин атындағы мектептің ішінен құрылған клуб. Жетекшісі Кәмшат Сағатқызы математика мұғалімі. Талдауда қатысушылар шығарманың ерекше мән үстейтін тұстарына тоқталды, мысалы, құдықтың орнын таңдағанда жерге жатып, тың тыңдап, үстінен көп жылқы өткізіп, судың қай нүктеден шығатынын анықтау дегеннің өзі сол заман адамдарының ерекше сезімталдығын көрсететіні, тағы басқа ерекшеліктері айтылды. Сондай-ақ, «Біз басқа бір адамның тағдырына шешуші роль атқарып кетуіміз мүмкін» деген пікір де ойландырады. Ал,Фариза есімді мұғалімнің «Маңғыстауға барып осы жерді қарау керек, бар ма екен сол құдық?», – дегені оның оқырман ретінде қаншалықты әсерленгенін байқатса керек. Сонымен «Шыңырау» не жайында айтатын шығарма еді?