Кітапханада 2024 жылдың 26 қараша күні сағат 15.00-де Қазақстанның халық жазушысы, мемлекеттік сыйлықтың лауреаты Әбдіжәміл Нұрпейісовтің туғанына 100 жыл толуына орай «Әбдіжәміл Нұрпейісов: өмір сыры мен шығармашылығы» атты дөңгелек үстел өтеді.
Айтулы мерейтой аясында жыл басынан бері республика көлемінде және халықаралық деңгейде түрлі әдеби-мәдени іс-шаралар ұйымдастырылуда. ҚР Ұлттық академиялық кітапханасындағы Ә.Нұрпейісов оқу залында өткелі тұрған шараның мақсаты жазушының тұлғалық бет-бейнесін ұлықтау, көркем еңбектерін насихаттау.
Әбдіжәміл Нұрпейісов еңбектері мемлекет тарапынан жоғары бағаланды. Жазушы «Еңбек Қызыл Ту», «Құрмет белгісі», Қазақстанның «Отан» ордендерімен марапатталған. КСРО Мемлекеттік сыйлығының лауреаты атанды. Соғыс жайлы естеліктерін қағаз бетіне түсіруден басталып, соңы үлкен романға айналумен аяқталған «Курляндия» туындысы үшін Жамбыл атындағы республикалық сыйлықты иемденген. Бұл кітап кейінірек жарық көріп, қазақ әдебиетінің алтын қорына енген «Қан мен тер» трилогиясының негізі болды. Жазушының тағы бір шоқтығы биік еңбегі – «Соңғы парыз» дилогиясы. Арал теңізінің апатқа ұшырау хикаясын әсерлі баяндаған осы еңбегі үшін әдебиетші Шолохов сыйлығымен марапатталған. Ә. Нұрпейісов шығармалары әлем әдебиетінде де жоғары баға алған. Еңбектері отыздан астам шет тіліне аударылып, қазақ әдебиетін халықаралық деңгейге көтеруге үлесін қосты. Әдеби туындылар жазумен қатар, Әбдіжәміл Нұрпейісов қоғам қайраткері ретінде де белсенді болып, біршама еңбек сіңірді.
Шара қонақтары жазушының еңбектерін терең талдап, оның қазақ әдебиетіне, әлемдік әдебиетке қосқан үлесіне тоқталмақ.
Әдеби шараға шығармашылық зиялы қауым және қоғам өкілдері, журналистер, оқырмандар, кітапханашылар қатысады.
Қазақстан Республикасының Ұлттық академиялық кітапханасы
Байланыс ақпараттары:
Астана қаласы, Достық көшесі, 11.
e-mail: uak_2022@mail.ru
Аккредитация үшін: 87027639151
Материалды көшіріп жариялау үшін редакцияның немесе автордың жазбаша, ауызша рұқсаты қажет және Adebiportal.kz порталына гиперсілтеме берілуі тиіс. Авторлық құқық сақталмаған жағдайда ҚР Авторлық құқық және сабақтас құқықтар туралы заңымен қорғалады. adebiportal@gmail.com 8(7172) 57 60 14 (ішкі - 1060)
Мақала авторының көзқарасы редакцияның көзқарасын білдірмейді.
