Қазақстанның халық жазушысы І дәрежелі «Барыс» орденімен марапатталды
Қасым-Жомарт Тоқаев ақын, журналист, Қазақстанның халық жазушысы Валерий Михайловты 80 жылдық мерейтойымен құттықтады.
– Табиғи талантыңыз бен еңбекқорлығыңыздың арқасында шығармашылық жолыңызда ерен табысқа қол жеткіздіңіз. Ұзақ жылдар бойы еліміздің беделді басылымдарында жемісті еңбек етіп, «Казахстанская правда» газеті мен «Простор» журналын басқардыңыз. Адамгершілігі мол әрі өмірлік ұстанымдарынан айнымаған тұлға ретінде қаламгерлер арасында және қоғамда үлкен құрметке бөлендіңіз, – деп жазылған жеделхатта.
Президент Қасым-Жомарт Тоқаев Валерий Михайловтың бірнеше буын оқырман қызыға оқитын шығармалары төл әдеби қазынамыздың бір бөлшегі ретінде лайықты бағаға ие болғанына назар аударды.
Сондай-ақ президент отандық әдебиеттің дамуына қосқан айрықша үлесі үшін жазушы Валерий Михайловты І дәрежелі «Барыс» орденімен марапаттау туралы Жарлыққа қол қойды. Валерий Михайлов Халықаралық «Алаш» әдеби сыйлығының және «Парасат» орденінің иегері. Көптеген жыл бойы «Казахстанская правда» газетінің және «Простор» журналында бас редакторы, Қазақстан Жазушылар одағы басқармасының хатшысы болып қызмет етті. Бірқатар қазақ жазушыларының шығармаларын орыс тіліне аударған.
