Жас кітапханашылар кездесуі өтпек 12+

Қазақстан Республикасы Мәдениет және ақпарат министрлігінің қолдауымен, Қазақстан Республикасының Ұлттық академиялық кітапханасының  ұйымдастыруымен  2024 жылдың 21 - 22  қараша күндері республикалық «Жас кітапханашы - 2024: Жаңа мүмкіндіктер уақыты 3.0» атты жас кітапханашылардың іскерлік кездесуі өтеді.

Еліміздегі кітапханалардың жас мамандары қатысатын шараның мақсаты – салаға келген жастардың мамандыққа деген сүйіспеншілігі мен кәсіби біліктілігін шыңдау, идеялары мен әдістеріне қолдау білдіріп, өзара тәжі­ри­бе алмасуына ықпал ету, іскер­лік қабілеттерін дамыту. 

Жастар форумы аясында кітапханашылар кітапхана саласы бойынша ұйымдастырылған тәжірибелі мамандардың шеберлік, іскерлік сағаттарына қатысып, тәжірибе алмасады. Әр өңірден келген жас мамандар Networking алаңында үздік жобаларымен бөлісіп, білікті спикерлердің қатысуымен өтетін "Кітапханадағы AI: шабыт пен идеялар", «Бастама. Бағыт. Байланыс» (Кітапханалар мен БАҚ-тың интеграциялық бай­ланысы), "Трансформация жағдайындағы Қазақстан кітапханалары: әлеуметтанулық зерттеу нәтижелері»: апгрейд-сессия т.б тренингтерде креативті ойларын ортаға салады. Сондай-ақ, қатысушылар «ÓzgeEpic» креативті-шығармашылық хабына, IQAS QUIZ интелектуалдар сайысына қатысып, рухани сәттердің  куәсі болмақ. 

Іс-шараға еліміздегі барлық кітапханалардың 19-35 жас аралығындағы елуден астам жас кітапханашылары қатысады деп күтілуде.

Шараға ҚР Мәдениет және ақпарат министрлігіне қарасты көпшілік кітапханалар мен Қазақстанның жоғары және орта оқу орындары кітапханаларының жас кітапханашылары, зиялы қауым өкілдері, қаламгерлер, студенттер қатысады деп жоспарлануда.        

Өтетін орны: ҚР Ұлттық академиялық кітапханасы, 

Астана қ., Достық көшесі 11

Аккредитация үшін: 87027639151