Шалқар Әбішұлы

Шалқар Әбішұлы (1944-2018) - 1944 жылы 5 мамырда Оңтүстік Қазақстан облысы, Бәйдібек ауданы, ҚошқарАта ауылында дүниеге келген.

1963 жылы Шымкенттегі кооперативтік сауда техникумын, 1964 жылы Алматыдағы ревизорлар дайындайтын бір жылдық мектепті, 1972 жылы Халықшаруашылық институтын бітіріп, селолық, аудандық, қалалық, облыстық сауда мекемелерінің бастығы болып қызмет еткен. Шымкент қаласындағы «Базар» жабық акционерлік қоғамының төрағасы, 1999–2007 жж. облыстық мәслихаттың депутаты болған. Қазір 1992 жылы өзі ашқан Шымкент қаласындағы халықтық «Аштықпен емдеу орталығының» директоры.

«Өмір сабақ өзгені ойландырсын», «Ана туралы жыр», (1995), «Жақсы болу – өзіңнен» (1999), «Ойланып көрші өзің де!», «Мән бергін, жастар, сөзіме!» атты кітаптары жарық көрген. 1995 жылы «Жыр додасы», 1996 жылы «Аңсаймын ауылымды», «Термелер» жинағы, 2007 жылы «Рух пен тәннің саулығы», «Аштықты ұстау – денсаулықтың кепілі» кітаптары жарық көрді. 2003 жылы ол жайында «Алпысқа келді бір ақын», 2004 жылы «Қос арман» атты кітаптар басылып шыққан. 1997 жылы «Облыстық жазбагер ақындар мүшәйрасының» бас жүлдегері болды. Мемлекетіміздің 10 жылдығына арналған медалімен марапатталған. ҚР Мәдениет және ақпарат министрлігінің «Мәдениет қайраткері» белгісімен марапатталған (2005), Бәйдібек ауданының Құрметті азаматы.