Мұратхан Шоқан

Мұратхан Шоқан – ақын, философ, Қазақстан Жазушылар одағының мүшесі. ҚР Ұлттық кітапханасы жанындағы “Жас қалам” бірлестігінің, «Әдебиет әлемі» орталығының жетекшісі, «Тұлға-достық» қоғамдық қорының директоры.

1974 жылдың 25 ақпанында ҚХР ШҰАР Тарбағатай аймағы Толы ауданы Ақбелдеу ауылында ағартушы отбасында дүниеге келген. 1994-1996 жылдары Шыңжаң  университетінен қазақ әдебиеті мамандығы  бойынша білім алған. 1997-1998 жылдары туған ауылында мұғалім, 1998-2001 жылдары Толы аудандық  мәдениет мекемесінде қызмет істеген. 2001 жылы тарихи Отаны – Қазақстанға оралды. 2003-2009 жылдары «Қазақ әдебиеті» газеті, «Жас қазақ» газеті, «Жазушы» баспасында жұмыс істеді. 2013-2015 жылдары Жамбыл атындағы жасөспірімдер кітапханасында, 2015-2018 жылдар аралығында Алматы қаласы жастар саясатын дамыту мемлекеттік қоры аясында «Әдебиет әлемі» орталығының жетекшісі, 2019-2020 жылдары Алматы қаласы Наурызбай ауданында «Рухани жаңғыру» бағдарламасы бойынша жауапты қызметтер атқарды. Қазіргі таңда ҚР Ұлттық кітапханасында қызмет етеді.

Еңбектері:

1. «Жиырманың жалыны» (1994ж.);
2. «Маған көктем сыйлашы» (2000ж.);
3. «Жүрекке жүгіну» (2007ж.);
4. «Тазалыққа ұмтылу» (2010ж.);
5. «Түнгі лирика» (2016ж.),
6. «Айды қонақ қылу» қатарлы жыр кітаптарының авторы.
7. «Жаратылыснама» (2010ж.);
8. «Бұзылған таразы болма» (2021ж.) қатарлы философиялық кітаптары жарық көрді.
9. «Әлем бесік  жырлары» атты  ән альбомды қазақшаға аударды.
10. «Тәуелсіздік жемісі» ( 2011);
11. «Қытайдағы қазақ кәсіпкерлері»; ( 2012)
12. «Қандастар үлесі»;
13. «Үздік 30 ауыл» қатарлы анықтамалық фотоальбомдардың идеясының авторы әрі құрастырушысы.
14. «Жастық – жалын жыр»,
15. «Жүз өлең» қатарлы жастар поэзиясы антологиясын  құрастырып, жарыққа шығарды.  Шығармалары өзбек, қырғыз, ұйғыр, қытай тілдеріне аударылды.

2019 жылы «Рухани жаңғыру» бағдарламасы аясында авторлық әдеби, мәдени жобасын жүзеге асырып, өзі басқаратын «Тұлға-достық» қоғамдық қорының қаржыландыруымен Алматы қаласында «Поэзия аллеясын» салып, халықтың игілігіне ұсынды. «Поэзия аллеясына» ақынның «Жаратылыснама» атты философиялық кітабындағы халықты рухани кемелденуге шақыратын «Кемелденудің жеті шеңбері» сахна етіп салынды.

2021 жылдың мамыр-қыркүйек айлары аралығында «Үздік 30 ауыл» жобасын іске асырып, жоба аясында Қазақстанның 14 облысын аралап, әлеуметтік ахуалы, инфраструктурасы, өнеркәсібі мен ауылшаруашылық салалары алдыңғы қатарда дамыған Үздік ауылдарды анықтап, іріктелген ауылдарды «Үздік 30 ауыл» атты жинаққа енгізіп, бастырып шығарды. Кітаптың тұсаукесер рәсімін Нұр-Сұлтан қаласында ҚР Ұлттық академиялық кітапханасында атқарып, анықтамалық жинақты ҚР Тәуелсіздігінің 30 жылдығына тарту етті.