Құрманғали Ұябаев

Құрманғали Ұябаев (1920–1971) 5 мамырда Алматы облысы, Қаскелең ауданы, Шамалған ауылында туған. Балалар үйінде тәрбиеленген. 1940–1950 жж. Кеңес Армиясы қатарында болған. 1950 жылдан бастап республикалық «Социалистік Қазақстан» («Егемен Қазақстан») газетінде ұзақ уақыт бойы жауапты хатшы, «Қазақ совет энциклопедиясы» бас редакциясының ғылыми редакторы болып жұмыс істеді.

Ақындық жолын 1939 жылдан бастаған, алғашқы өлеңдер жинағы 1949 жылы жарық көрді. Шағын өлеңдермен бірге поэмалар да жазды. Балаларға арналған «Балақан, ботақан, қошақан» (1962), «Бөбектер» (1969) атты кітаптары шықты. «Қырдағы қырандар» деген очерктер жинағы бар.

А.Пушкиннің, А.Мицкевичтің, П.Антокольскийдің, А.Твардовскийдің, М.Исаковскийдің, С.Щипачевтің өлеңдерін қазақ тіліне аударды.

КСРО медальдарымен, Қазақ КСР Жоғарғы Кеңесінің Құрмет Грамотасымен марапатталған.

Шығармалары: Шығыс шыңында. Өлеңдер. А., ҚМКӘБ, 1949; Жырларым. Өлеңдер. А., ҚМКӘБ, 1962; Құтты қоныс. Өлеңдер. А., «Жазушы», 1965; Тағдыр туралы сөз. Поэма, А., «Жазушы», 1970; Дарқан далам. Өлеңдер. А., «Жазушы», 1972; Таңдамалы. Өлеңдер. А., «Жазушы», 1978.