Елдос Тоқтарбай

Елдос Нүсіпұлы ТОҚТАРБАЙ – балалар жазушысы, әдебиет сыншысы, ҚР Үкіметінің «Дарын» мемлекеттік жастар сыйлығының лауреаты (2017). 1993 жылдың 2 қаңтарында Алматы облысының Көксу ауданы, Балпық би кентінде дүниеге келген. Ы.Алтынсарин атындағы АрқМПИ-ның филология факультетін, Л.Н.Гумилев атындағы ЕҰУ-нің магистратурасын тәмамдаған.

Арқалық қаласындағы көпсалалы колледжінде «қазақ тілі мен әдебиеті» пәнінің оқытушысы, С.Сейфуллин музейінің Бас ғылыми қызметкері, Қазақстанның «Ақ жол» демократиялық партиясының идеологиялық жұмыстар бөлімінің аға сарапшысы, республикалық «Жас қазақ», «Ана тілі» апталықтары мен «Дәстүр» этнографиялық журналының Астана қаласындағы меншікті тілшісі, халықаралық «Қазақстан ZAMAN» газетінің Астана қаласындағы меншікті тілшісі және «саясат, жастар мәселесі» бөлімінің редакторы қызметтерін атқарған.

Көркем әдеби шығармалары «Кәусар бұлақ» (2012), «Аңсар» (2013), «Балауса жырлар» (2014), «Тәтті алма» (2015), «Жетісуға құйылған жылғалар» (2017) сияқты ұжымдық жинақтарына енген.

«Мен де АрқМПИ түлегімін...» (2014), «Ақ желкеннің ұландары» (2015) прозалық кітаптары мен «Қайраткер, ғалым, қаламгер Ахмет Байтұрсынұлының әдеби мұрасы» (2013), «Қазақ әдебиеті тарихындағы түрме шығармашылығы және эмигранттық кезең» (Генезис.Эволюция. Поэтика) монографиясының авторы.

Шығармашылық жетістіктері: Республикалық «Журналист болғың келе ме?» (2010), халықаралық «Қаламгер Азамат» (2011), халықаралық «Дарабоз» әдеби байқауы (2012), республикалық Т.Рымжанов атындағы шығармашыл жастар фестивалі (2013), республикалық «Аңсар» шығармашылық байқауы (2014), республикалық «Балауса» байқауының жеңімпазы (2014, 2015).

Жалпыұлттық «Алаштың Ақ жолы» байқауының лауреаты (2016), Ғ.Мұратбаев атындағы Республикалық жастар сыйлығының лауреаты (2017), ҚР Халық жазушысы Ә.Нұршайықов атындағы стипендияның иегері (2017), ҚР Үкіметінің «Дарын» мемлекеттік жастар сыйлығының лауреаты (2017).