Бауыржан Бабажанұлы

Бауыржан Бабажанұлы - 1969 жылы 21 ақпанда Қарақалпақстан Республикасы Мойнақ ауданында туған. Ақын, журналист. Әл-Фараби атындағы Қазақ ұлттық университетінің филология факультетін бітірген (1995). «Жалын» журналында, «Ана тілі» – «Жалын» бірлескен басылымдарында бөлім редакторы, «Алтын Орда» газетінде бас редактордың орынбасары, Ақтөбе облыстық тілдерді дамыту басқармасында бөлім меңгерушісі болып қызмет істеген. Қазір облыстық «Ақтөбе» газетінің бас редакторы. Қазақстан Жазушылар одағы Ақтөбе бөлімшесінің директоры. «Аспан мен жердің арасы» («Елорда», 2001); «Уәде» («Жазушы», 2006); «Сүлейменнің жүзігі» («А-Полиграфия, 2009); «Ниетқабыл» («Хан тәңірі», 2014) жыр жинақтары жарық көрген. Халықаралық VІ «Шабыт» фестивалінің «Әдебиет» аталымы бойынша бас жүлдегері (2003), «Экспресс К» газетінің бас редакторлар арасында өткізілетін байқауында Геннадий Толмачев атындағы жүлдені иеленген (2008); Төлеген Айбергеновке арналған республикалық мүшәйраның жеңімпазы. Қазақстан Республикасының Құрмет грамотасы, «Қазақстан Конституциясына 10 жыл», «Қазақстан Республикасы Тәуелсіздігіне 10 жыл» медальдарының иегері.

Қазіргі күні «Түркістан» газетінің бас редакторы.