Бақыт Ихсанұлы

Бақыт Ихсанұлы (31 мамыр 1934, Шығыс Қазақстан облысы, Тарбағатай ауданы, Бозша ауылы – 31 тамыз 2016, ШҚО, Тарбағатай ауданы, Ақжар ауылы) – педагог, журналист, ақын, шежіреші. Қазақстан Журналистер одағының мүшесі, «Тарбағатай ауданының құрметті азаматы», «Тыл және еңбек ардагері» төсбелгісінің, «Құрмет грамотасының» иегері.

Өмірбаяны

ШҚО, Зайсан қаласындағы педагогикалық училищені тәмамдаған (1954). Еңбек жолын мектепте мұғалім болып бастаған. Аудандық атқару комитетінде нұсқаушы қызметін атқарған.

Қазақ мемлекеттік университетінің филология факультетін журналистика мамандығы бойынша тәмәмдаған (1964). Отыз жылдан астам уақыт бойы баспасөз саласында қызмет істеген. Облыстық «Коммунизм туы» (қазіргі «Дидар», 1965-85 жж.) газетінде Тарбағатай ауданы бойынша меншікті тілші болып қызмет атқарды. Аудандық «Ленин туы» (қазіргі «Тұғырлы Тарбағатай») газетінде редактордың орынбасары болды.

Балалар жазушысы ретінде де белгілі қаламгер. Өлеңдері «Қазақстан пионері» («Ұлан») газеті, «Жұлдыз», «Парасат», «Пионер» («Ақ желкен»), «Балдырған», «Ақ Ертіс» журналдарында жарияланған. Бастауыш сыныптың «Ана тілі» оқулығына өлеңдері енген. Жас күнінде айтыскер ақын ретінде де танылған. Өлеңдері аудандық, облыстық, республикалық басылымдарда жарияланған. Көптеген антологиялық жинақтарға жырлары енген («Суырлының сұлу саздары», 2004; «Шығыс Қазақстанның шынайы шежіресі», 2011). Бірнеше ән өлеңдердің туындыгері.

Шығармалары