Әуелбек Əнуарбек

ӘУЕЛБЕК ӘНУАРБЕК 1962 жылы 1қаңтарда Тәжікстан Республикасының Куляб облысы Пархар ауданында туған. 1969 – 79 жж. Қызылорда облысы Жаңақорған ауданы «Сунақата» совхозындағы № 194 қазақ орта мектебінде оқып, одан кейінгі еңбек жолын ауылда жұмысшы болып бастаған.

1986 жылы әл-Фараби атындағы Қазақ ұлттық университетiнiң журналистика факультетiн бiтiрген. Республикалық «Лениншiл жас» («Жас Алаш»), «Қазақ әдебиетi», «Егемен Қазақстан», халықаралық «Түркiстан», «Дала мен Қала», «Әдебиет айдыны» газеттерi мен «Хабар» телеарнасында қызмет iстеген. «Алматы ақшамы» газетi бас редакторының бірінші орынбасары, 2003 – 05 жж. «Хабар» телеарнасынан берiлiп тұрған тарихи-танымдық 110 сериялы «Солай болған» бағдарламасының авторы.

Публицистикалық еңбектерi «Аралым – арым, Балқашым – бағым», «Саңлақтар», «Қызыл қырғын», «Қажымұқан қағанаты», «Азаттық аңсағандар», «Байырқұмның баласы», «Таңдаулы», «Сығанақ төсіндегі сазды әуендер» атты кітаптар мен басқа да жинақтарға енген. 1998 жылы жарыққа шыққан «Ақ жауынды шақ», 2009 жылы тасқа басылған «Жаныңмен жаз сырыңды» атты жыр кiтаптарының, сондай-ақ «Солай болған» (2012) және «Болашағына қол созған Қазақстан» (2012) атты публицистикалық кітаптардың авторы.

Өлең-жырлары 2015 жылы жарыққа шыққан 10 томдық «Қазақ поэзиясының антологиясына» енген. «Мәдениет қайраткерi», «Ақпарат саласының үздігі» төсбелгілерінің «Қазақстан Конституциясына 20 жыл», «Қазақстан Тәуелсіздігіне 25 жыл» мерекелік медальдары мен «Ы.Жақаев» медалінің иегері.