Мәди Алжанбай

Мәди Алжанбай - 1976 жылы 6 наурызда Алматы облысы Кеген ауданы Жалаңаш ауылында туған. Әл-Фараби атындағы ҚазҰУ-дың журналистика факультетін бітірген (2000). 2001 жылдан бастап «Үш Қиян» баспасында бас редактордың орынбасары, 2004 жылы тамыз-қараша айларында Республикалық «Жас Алаш» газетінде тілші, 2005-06 жж. «Қазақстан» ТРК, Қазақ радиосының жаңалықтар қызметінде аудармашы, 2006-07 жж. «31-канал» телеарнасының жаңалықтар қызметінде тілші, 2007-08 жж. «КТК» телеарнасында тілші, 2008-09 жж. «Үркер» журналында бас редактордың орынбасары, 2009-12 жж. «Қазақ әдебиеті» апталығында бөлім редакторы, жауапты хатшы қызметтерін атқарды. Қазір Алматы облыстық «Жетісу» газетінде заң және саясат бөлімінің меңгерушісі.

Аудармалары мен әңгімелері мерзімді баспасөзде 2000 жылдан бері жарияланып келеді. 2007 жылы Павлодар облысы Баянауыл ауданында өткен Жас қаламгерлердің республикалық I форумында кітабы мемлекеттік тапсырысқа қабылданған. 2008 жылы «Жалын» баспасынан «Шие жапырағы және сыбызғы» атты жинағы шықты. 2009 жылы Қазақстанның Тұңғыш Президенті қорының ұйымдастыруымен жарық көрген «Қарақат тере барғанда» атты әңгімелер жинағына екі әңгімесі кірген. 2012 жылы «Жалын» баспасынан «Автобустағы әңгіме», 2014 жылы мемлекеттік тапсырыспен «Сөздік-Словарь» баспасынан «Қолтаңба» атты кітаптары, Алматы облысы әкімінің қолдауымен 2017 жылы «Құлажирен» атты кітабы жарық көрді.