Несіпбек Дәутайұлы

Несіпбек Дәутайұлы (1947-2021) 30 желтоқсанда Жамбыл облысы Қордай ауданы Киров атындағы ұжымшарда (қазіргі Кенен ауылы) туған. Қазақ мемлекеттік университетін бітірген.

1972-80 жж. аудандық «Қордай» газетінде тілші, бөлім меңгерушісі, жауапты хатшы қызметтерін атқарды. Жамбыл облыстық газетінде меншікті тілші, Қазақстан Жазушылар одағы Жамбыл облыстық бөлімшесінің директоры, «Жамбыл» әдеби-көпшілік журналының бас редакторы болды.

«Ақ көгершін», «Алма ағашының бұтағы», «Әнім сен едің» атты повестердің, «Құдірет пен Қасірет» романының авторы. «Көгілдір көйлекті келіншек», «Ойынды еті он бөлек» кітаптары, «Ан Арыс» баспасынан мемлекеттік тапсырыспен екі томдық таңдамалысы жарық көрді (2008 – 2009).

Таңдаулы көркем шығармаларға арналған республикалық жабық бәйгелердің жүлдегері, Ғ.Мұстафиннің 100 жылдығына байланысты үздік әңгімелерге арналған әдеби бәйгенің бас жеңімпазы. ҚР Ұлттық кітапханасы өткізген «Ең үздік роман» байқауында «Құдірет пен қасірет» романы жүлдеге ие болған. Халықаралық «Алаш» әдеби сыйлығының,

«Қазақ әдебиеті» газетінің проза жанры бойынша сыйлығының иегері. Қазақстан Республикасы Тәуелсіздігі және Астананың 10 жылдығына арналған медальдармен марапатталған. Халықаралық «Дарабоз» әдеби бәйгесінің бас жеңімпазы. Қазақстанның еңбек сіңірген қайраткері.