Нұрғали Ораз

Нұрғали Ораз - 1960 жылы 25 тамызда Оңтүстік Қазақстан облысы Қазығұрт ауданы Монтайтас ауылында туған. Әл-Фараби атындағы қазақ мемлекеттік университетінің журналистика факультетін 1982 жылы бітірген. Содан бері қазақ баспасөзінде жұмыс істеп келеді. Республикалық «Жалын» баспасында жетекші редактор, «Қазақ әдебиеті» газетінде бөлім меңгерушісі, бас редактордың орынбасары, «Парасат» журналында бөлім меңгерушісі, бас редактордың орынбасары, облыстық «Оңтүстік Қазақстан» газетінде бас редактор, «Сақшы» газетінде бөлім меңгерушісі, «Ақ желкен» журналында бас редактор, «Жас қазақ» газетінде бас редактордың орынбасары, «Алматы ақшамы» газетінде шолушы болып қызмет етті. Қазір республикалық «Егемен Қазақстан» газетінің Алматы қаласындағы тілшілер қосынының меңгерушісі.

«Соқпақ жол», «Бақыршаның балалары», «Қазығұрт оқиғалары», «Даладан қалаға келгендер», «Биіктегі сұлулық», «Түнгі жалғыздық», «Сиырлы көл» атты т.б. кітаптары жарық көрді. 2002 жылы «Аяқталмаған ертегі» атты кітабына Халықаралық «Алаш» сыйлығы, 2015 жылы «Менің де өмірім бір қызық кітап» атты хикаятына халықаралық М.Қашқари атындағы сыйлық берілді.

2007 жылы ҚР Президентінің Мақтау грамотасымен, Ы.Алтынсарин медалімен марапатталды. Түрік әдебиетінің классигі Х.Танердің әңгімелерін үздік тәржімалағаны үшін Түрік мемлекетінің Х.Танер атындағы медалін алды. 2010 жылы Тәуелсіздік толғауы байқауында «Адасқан жұлдыз» атты пьесасы жүлделі орынға ие болды.