Кеше Қазақстан Жазушылар одағының мүшесі, қоғам қайраткері, ақын, журналист, жазушы және сазгер Әкім Ысқақтың «Көңіл қымбат» атты шығармашылық кеші өтті.
Оған еліміздің беделді тұлғалары, бас редакторлар клубының мүшелері, қоғам қайраткерлері мен ақын-жазушылар, ұстаздар және студенттер қатысты. Ақынның «Көңіл қымбат» деп аталатын жаңа кітабының тұсаукесер «лентасын» академик Болат Көмеков пен Елтаңба авторы Жандарбек Мәлібеков қиды. Көңілді кештің құрметті қонақтары жазушының өлеңдерін жатқа оқып, әндерін орындады.
– Бүгінгі басқосудың орны ерекше, олай болатын себебі, менің «Көңіл қымбат» деген авторлық радиобағдарламам бар. Мен осы бағдарламаны бірнеше жылдан бері жүргізіп келемін. Енді, міне, арнайы кітап етіп шығардық. Шынында да, адам баласына мына өмірде көңілден қымбат ештеңе жоқ. Сенің қаншама миллиондаған ақшаң болғанымен, адамдық қасиетің болмаса ешкім де бағаламайды. Қазақта «күлкі – ашылған гүл, көңіл – шашылған нұр» деген жақсы бір мақал бар.. Мына өмірге келген әрбір азамат адамдық қасиетімен танылып, біреуге жақсы сөзін арнаса ғана, жақсы жауап еститіні анық. Сол себепті, бұл фәниде адамдық көңілдің қымбат екендігіне еш талас жоқ.
Жалпы, бүгінгі кездесу Тәуелсіздігіміздің 25 жылдығына, Қазақ радиосының 95 жылдығына және Шалқар радиосының 50 жылдығына арналып отыр, – деді кеш иесі Әкім Ысқақ.
Сонымен қатар, ақынға «Халықаралық журналистер одағының мүшесі» төсбелгісі табыс етілді.
Эльмира МӘТІБАЕВА,
«Егемен Қазақстан».
Материалды көшіріп жариялау үшін редакцияның немесе автордың жазбаша, ауызша рұқсаты қажет және Adebiportal.kz порталына гиперсілтеме берілуі тиіс. Авторлық құқық сақталмаған жағдайда ҚР Авторлық құқық және сабақтас құқықтар туралы заңымен қорғалады. adebiportal@gmail.com 8(7172) 57 60 14 (ішкі - 1060)
Мақала авторының көзқарасы редакцияның көзқарасын білдірмейді.
