2023 жылғы 8 қараша күні Қазақстан Республикасының Ғылым және жоғары білім министрлігі Тіл саясаты комитеті Ш.Шаяхметов атындағы «Тіл-Қазына» ұлттық ғылыми-практикалық орталығы дәстүрлі «Қазақша мәзір» республикалық конкурсын ұйымдастырды.
Комитет төрағасы Ербол Тілешов құттықтау жолдап, шараның басты мақсаты тағамтану саласының терминдері мен ас мәзірі атауларына жалпылық сипат беру, олардың қолданысын жүйелендіру мен қазақшалаудың ұтымды механизмін іздестіру арқылы кәсіби терминшілер легін қалыптастыру екенін атап өтті.
Бас директор Мақпал Жұмабайдың айтуынша, байқауға еліміздің түкпір-түкпірінен 31 үміткер қатысыпты. Жүлдегерлерді анықтауға филология ғылымдарының докторы, академик Шерубай Құрманбайұлы, Ахмет Байтұрсынұлы атындағы Тіл білімі институты Терминологиялық орталығының басшысы, филология ғылымдарының кандидаты Сәрсенбай Құлманов, Семей қаласы Шәкәрім атындағы университеті ЖОО кейінгі білім беру бөлімінің жетекшісі, Тамақ өндірістерінің технологиясы және биотехнология кафедрасының қауымдастырылған профессоры, техника ғылымдарының кандидаты Алмагүл Нұрғазезова, Алматы технологиялық университеті Тамақ өнімдерінің технологиясы кафедрасының қауымдастырылған профессоры, техника ғылымдарының кандидаты Гаухар Күзембаева, «KAZGOR» жобалау академиясы» ЖШС бас аудармашы-редакторы, 2022 жылы өткізілген «Ұлттық сипаттағы бизнес терминдері» конкурсының І орын иегері, гуманитарлық ғылымдар магистрі Гүлфаруз Иса қазылық етті.
Алғашқы «Термин талқы» іріктеу кезеңінде қатысушылар «Теrmincоm.kz» сайтындағы «Қазақ терминологиясының мазмұны мен құрылымы» электрондық алаңына тіркеліп, өз пікірлері мен ұсыныстарын жазды. Келесі «Термин зерде» кезеңінде тағамтану саласы терминдерінің ішінен 15 терминді таңдап, үлгіге сәйкес сараптама жасаса, бұдан соң «Мәзіріңіз әзір ме?» кезеңінде қоғамдық тамақтану орындарындағы бес ас мәзірінің қазақ тіліндегі қолданысына талдау жасап, өз нұсқаларын ұсынды. Ең соңғы «Термин-тезис» кезеңінде үміткерлер тағамтану саласы немесе ас мәзірін қалыптастырудың өзекті мәселелері бойынша тезис әзірледі.
Бас жүлдені Қызылорда қаласындағы химия-биология бағытындағы Назарбаев Зияткерлік мектебінің қазақ тілі мен әдебиеті пәнінің мұғалімі Гүлзат Шынтасова жеңіп алды. І орынға Л.Н.Гумилев атындағы ЕҰУ магистранты Дана Талғатбек ие болды. ІІ орын Шымкент қаласындағы Ж.Тәшенов университетінің магистранты Балнұр Балтабайқызының қанжығасына байланса, ІІІ орынды көкшетаулық Шолпан Махамбетова мен «Астана ақшамы» газетінің шолушысы Қалиакбар Ағылан өзара бөлісті. Ана тіліміздің өркендеуіне белсене ат салысуымен көзге түскен төрт үміткер Алғыс хатпен марапатталды.
Материалды көшіріп жариялау үшін редакцияның немесе автордың жазбаша, ауызша рұқсаты қажет және Adebiportal.kz порталына гиперсілтеме берілуі тиіс. Авторлық құқық сақталмаған жағдайда ҚР Авторлық құқық және сабақтас құқықтар туралы заңымен қорғалады. adebiportal@gmail.com 8(7172) 57 60 14 (ішкі - 1060)
Мақала авторының көзқарасы редакцияның көзқарасын білдірмейді.
