Бүгін, наурыздың 31 жұлдызы күні, Астана қаласы ҚР Ұлттық академиялық кітапханасында «Қазақ әдебиетінің қос жұлдызы» атты Тәкен Әлімқұлов пен Жұмекен Нәжімеденовке арналған әдеби кеш өтті. Әдеби кеш. «Бір ел - бір кітап» 2025 респубикалық акциясы аясында өткізілді.
Кештің өтуіне мұрындық болған Астана қаласы әкімдігі техникалық колледжі мен кітапхана ұжымы бірлесе отырып, биылғы еңбек адамы жылының аясында техникалық колледж студенттерінің әдеби саладағы тұлғалармен де етене таныс болу мақсатында өткізілді. Тағы бір жағынан – биылғы ел болып оқуға таңдалынған қос қаламгер – Тәкен Әлімқұлов пен Жұмекен Нәжімеденовтің шығармашылығын насихаттауға аз да болса үлес қосып, шығармашыл тұлғаларың есімдері мен әдеби мұрасын техника саласындағы студенттердің де хабардар болуын қамтамасыз ету болды.
«Бір ел – бір кітап» республикалық акциясы 2007 жылдан бастап бүкіл ел көлемінде өткізіліп келе жатқанын ескерте кетсек, биыл қазақ әдебиетінің поэзия және проза жанрынан қос тарланы – Тәкен Әлімқұлов пен Жұмекен Нәжімеденовтің еңбектерін оқу жылы болып ҚР Мәдениет және ақпарат министрлігінің тарапынан бекітілген еді.
«Ұлтымыздың көрнекті жазушысы, ақын, сыншы, аудармашы, суреткер Тәкен Әлімқұловтың шығармалары мен поэзия жанры бойынша мемлекеттік сыйлықтың иегері, көрнекті ақын, биыл 90 жылдық мерейтойы аталып өтетін Жұмекен Нәжімеденовтың шығармалары көпшілік кітапханаларда түрлі форматтарда жан-жақты насихатталуда», - деп атап өтті Ұлттық академиялық кітапханасының баспасөз парағында.
Әдеби шараға қоғам қайраткерлері, мұғалімдер, колледж студенттері, оқырмандар қатысды.
Модератор Қайрат Асқаров, Техникалық колледждің қазақ тілі мен әдебиетінің оқытушысы
«Заманының заңғар жазушысы Әбіш Кекілбаев: «Кітапхана мәңгілік парасаттың киелі ғимараты», - деп айтқандай, бұл күнде мәдениеттің ошағына айналған, руханияттың алтын қазығындай болған Ұлттық академиялық кітапхананың төріне шығып, сөз бастаудың өзі мәртебе. Өткен ғасыр қазақ әдебиетінің қос жұлдызы Жұмекен Нәжімеденов пен Тәкен Әлімқұловтың өмірі мен шығармашылығын насихаттап, мынау жас толқынның зейінін ашуға осы жерге жиналып отырған жайымыз бар. Біздің әрбір заманда әрбір толқыннан толқын ауысқан сайын ұлттың бет-бейнесін, болмысын қалтқысыз жасап келе жатқан оның әдебиеті төл тілі. Ендеше, сонау он бесінші ғасырдан бастап Қазақ мемлекеті қалыптасқаннан бері қарасақ, әрбір заманда өзінің ұлы тұлғалары, даңғайыр дарындары өмір сүрген екен. Асан қайғы, Қазтуған, Доспанбет Шалкиіз, бертін бір төбе болып Бұқар жырау бабамыз. Одан кейін Махамбет, міне, сөйтіп келіп, он тоғызыншы ғасырда қазақ әдебиетінің жарық жұлдызындай болып хакім Абай келді. Абайдың ізін басып, Шәкәрім, Мағжан, Қасым Аманжол, міне, біз оқу залында отырған Мұқағали Мақатаев келді. Солардың соңынан бүгінгі тақырыпқа тиек болған «Қос жұлдызымыз» жазушы, аудармашы, әдебиет сыншысы Тәкен Әлімқұлов пен біздің бүкіл әлемдегі құжатымыз болған мемлекеттік Әнұранымыздың авторы, атақты ақын Жұмекен Нәжімеденов», деп модератор сөзді әріден қозғады, тереңнен толғады.
Қоғам қайраткері, педагогика ғылымдарының докторы, ҚР Сенаторлар кеңесінің мүшесі Динар Нөкетаева:
«Алғаш тәуелсіздік алған жылдағыдай емес, қазір есіміз кіріп, етек-жеңіміз жинақталған күнге де жетіп қалдық. Бұрынғыдай емес, қазір ел болып кітап оқудың жақсы тенденциясы қалыптасып келеді. Жарысып оқу, сұрап оқу, таласып оқу деген жақсы үрдіс. Естеріңізде болса былтырғы жыл көрнекті балалар жаушысы Бердібек Соқпақбаевтың шығармашылығына арналғанын жақсы білеміз. Ал биыл 2025 жылы соның оң нәтижелерін көріп жатырмыз. Бұл жерде жазушының ғана есімі жаңғырып ғана қоймай «Менің аты Қожа» киносының да жаңа заманға бейімдеген нұсқасы қайтадан түсірілгенін айта кетсек болады. Биылғы бір ел бір кітап акциясына қаламгер тұлғаларымыз Тәкен Әлімқұлов пен Жұмекен Нәжімеденов шығармашылығына арналып отыр. Бұл үрдіс біздің азамттардың көп кітап оқуына себеп болатыны даусыз. Мысалға, әлемде кітап оқудан ең бірінші орында Үнді мемлекеті тұрады екен. Аптасына он сағаттан артық кітап оқиды екен. Екінші орында Қытай, үшінші орында Тайланд мемлекеті. Ал, біздің еліміз болса, бүгінгі күні қырық алтыншы орында екен. Сондықтан да біз алдымызға қойып отырған осы аксция төңірегінде мықтап кітап оқу үрдісін үздіксіз жандандыра беруіміз керек», - деп аяқтады сөзін экс-сенатор.
Астана қаласы әкімдігі Техникалық колледжінің директорының оқу ісі жөніндегі орынбасары Мөлдір Назарбаева:
«Мемлекет басшысы биылғы жылды жұмысшы мамандықтардың өкілдеріне арналатын жыл деп атап өткені белгілі. Соның негізінде бүгін міне, біздің колледжіміз Астана қаласының ең үлкен және ресми білім беру ұйымдарының ішінде ең алғаш болып, «Бір ел – бір кітап» акциясының шеңберінде осы Ұлттық академиялық кітапханамен бірлесе отырып үлкен іс-шара өткізіп отырмыз. Біртұтас тәрбие бағдарламасы аясында біздің колледжіміздің білім алушылары оқуға деген қызығушылығын арттыру үшін оқуға құштар ұлт жобасын мекемемізде жүзеке асырып отырмыз. Қазіргі таңда біздің оқу орнында бес мамандық, он бес біліктілік бойынша білім беріліп, жұмысшы мамандарды даярлап отырмыз. Бүгін біздің колледждің білім алушылары мен оқытушылары ұлтымыздың мақтанышы болған жазушыларының еңбектеріне құрметтерін көрсетіп, өлеңдерін оқып, ұлағатты өмірлерінен естеліктер айтып, сондай бір рухани кешті ұйымдастырып отырмыз. Осы жерде Ұлттық Академиялық кітапханасының ұжымына алғысымыз шексіз. Сіздерге рахмет айтамыз осындай бізді қолдап, іс-шарамызға атсалысып, үлкен бір залды беріп жатырсыздар», - деп кітапхана ұжымына алығысын білдіріп сөзін аяқтады.Кеш барысында күмбірлеп күй тартылып, ақын өлеңдерінен студенттер өлең оқып, әннен шашу шашылды.
Материалды көшіріп жариялау үшін редакцияның немесе автордың жазбаша, ауызша рұқсаты қажет және Adebiportal.kz порталына гиперсілтеме берілуі тиіс. Авторлық құқық сақталмаған жағдайда ҚР Авторлық құқық және сабақтас құқықтар туралы заңымен қорғалады. adebiportal@gmail.com 8(7172) 57 60 14 (ішкі - 1060)
Мақала авторының көзқарасы редакцияның көзқарасын білдірмейді.
