Қапан Сатыбалдин

Басты бет

Авторлар

Қапан Сатыбалдин

Қапан Сатыбалдин (1917–1969) Қарағанды облысы, Қарқаралы ауданында туған.

Балалар үйі жанындағы мектепте және Таукен өнеркәсібі училищесінде оқып білім алған. Абай атындағы Қазақ педагогика институтында, Мәскеудегі кинематография институтында оқыған. Қазақстан Жазушылар одағының жас жазушылар секциясын басқарды, республикалық газеттер редакцияларында және Қазақ КСР кинематография комитетінде қызмет істеді. Кезінде Жамбылдың әдеби хатшысы болды. 1943–1944 жж. соғыс майданында «Совет жауынгері» газетінде қызмет етті. «Жұлдыз» журналында бас редактордың орынбасары, «Қазақ әдебиеті» газетінің бас редакторы, біраз уақыт Қазақстан Жазушылар одағының хатшысы болған. 1938 жылы «Мен жырлаймын» атты алғашқы өлеңдер жинағы шықты. Комсомолдың 20 жылдық мерекесіне арналған республикалық конкурста «Алғашқы сыр» поэмасы бәйге алды. 1940 жылы «Айдан тамған жас», «Махаббат» поэмаларын жазды. Ұлы Отан соғысы жылдарында өлеңдері, очерктері республикалық және майдандық газеттерде жиі басылып тұрды.

1945 жылы Кеңестер Одағының Батыры Әлия Молдағұловаға арналған поэмасы басылды.

Бірқатар драмалық шығармалардың да авторы. Киносценарийлері бойынша көркем және деректі фильмдер түсірілген. Крыловтың мысалдарын, Некрасовтың поэмасын, Гулианың повесін, Горбатовтың пьесасын және туысқан республикалар ақындарының өлеңдерін аударған.

Шығармалары: Мен жырлаймын. Өлеңдер. А., ҚМКӘБ, 1938; Бейбітшілік күні астында. Өлеңдер. А., ҚМКӘБ, 1952; Мың есік. Өлеңдер. А., ҚМКӘБ, 1950; Қара торғай. Повестер, әңгімелер, эсселер. А., «Жазушы», 1968; Төрт томдық шығармалар жинағы. А., «Жазушы», 1971–1975.