Ақын Гүлзада Ниетқалиева дүниеден өтті
Ақын, журналист, сыншы-ғалым, филология ғылымдарының кандидаты, Қазақстан Жазушылар одағының мүшесі және халықаралық «Алаш» әдеби сыйлығының иегері Гүлзада Рахметқызы Ниетқалиева дүниеден өтті.
Ақын Гүлзада Рахметқызының бірнеше жыр жинағы жарық көрген. Сонымен қатар ол – әдеби сын мен публицистика жанрында да кең құлаш сермеген қаламгер. Рахымжан Отарбаев пен Есенғали Раушанов шығармашылығына арналған зерттеу еңбектері соның айғағы. Сондай-ақ баспасөз саласында да ұзақ жылдар бойы адал қызмет етті.
Ақынның бауырлары мен жақындарына қайғырып көңіл айтамыз. Жуырда ғана «Әдебиет порталына» ақынның бір топ өлеңдері жарияланған еді.
БІР ЖЫЛЫ СӨЗ
«Париж — миллиондардың жалғыздығы...»
Франсуа Моруа
Мынау сұрқай, тас қалаға тұтқын боп,
Жалғыздардың шер-наласын ұқтым көп…
Көк түтіні көрсетпейтін аспанын
Сұр қаладан азат болып шыққым кеп...
Жанталасқам... қол созбады еш пенде,
Көкірегінен жарық сәуле көшкен бе?!
Ай-жұлдызы көрінбейтін аспанға
Қарауменен шаршайтынмын кештерде.
Адамдар да... бұл қалада тас түйін,
Қиналса да алмай көзге жас түйір...
Бір-бірінен мықтылығын дәлелдеп,
Бір-біріне болмас және босқа үйір...
Жалғыздыққа жүректегі пенде боп,
Көңіл бұлтын көрсетпеймін елге көп...
Түйір тамшы еншілеген аспаным,
Тереземді айғыздайды «сенбе» деп...
Қала солай... жалғыздықтар мыңдаған,
...Жүрегімнің арыз-мұңын тыңдағам.
Мұңлықтарын аяп үнсіз күрсінер,
Жөргегінде құндақтаған бұл ғалам.
