Түркістан тұтқыны
Автордың "Түркістан тұтқыны" атты романына негізінен, аяғы кешегі өзінің де, Кеңес Одағының да түбіне жетіп тынған, демократия, интернационализм атын жамылып, бәрін де "өзі біліп", бәрін де бір өзі билеп-төстеген коммунистік тоталитарлық өктем жүйенің солақай саясаты арқау болған. Бұл жағы шығармада оның басты кейіпкерлері: кешегі "халық жауы", сталиндік ВКП(б) тарихының оқытушысы, райкомның екінші хатшысы Б. Қонақбаев пен журналист Сыраштың Горбачев жариялылығы төңірінде өрбіген әңгіме-сұхбаттық ой-толғамдарды арқылы жаңа қырынан көрініс табады.
Сонымен бірге, бұл кітапқа автордың бір топ әңгімелері қоса берілді. Сіз бұл әңгімелерден осы күндері көрген түстей ұмыт болып бара жатқан, кешегі "Адам-адамға дос, жолдас және бауыр" дейтін адамгершілік кодексімізге тән: адалдық, әділдік, мейірімділік, әдептілік, шынайы сүйіспенділік деген секілді адами, рухани, қадір-қасиеттерімізбен қайта кездесіп, қайта қауышқандай әсер аласыз. "Адамға адам-қасқыр" деп, дүниенің бар тетігі байлықта, ақшада деп, құрсағынан жезөкшілік дйсіз бе, шет елге бала сату дейсіз бе, спид індеті дейсіз бе - неше түрлі пәлелерді өрбіткен аш көзді, қанды балақ капитализмге қарап бой түзеген қоғами болмысыздың бүгіңгі моральдік сықпыт-сияғына қарап, сол адами, рухани құндылықтарымыздың барған сайын бәсі түсіп, аяқ асты боп бара жатқан жоқ па осы дегендей ой шығармауында қаласыз...
