Керімбек Сыздықов

Керімбек Сыздықов (1939–2008) Оңтүстік Қазақстан облысының Созақ ауданында туған. 1956–1961 жж. Қазақ мемлекеттік университетінің филология факультетінде, 1964–1967 жж. аспирантурасында оқыды.

1961–1964 жж. Шымкент педагогика институтында оқытушы, 1967–1974 жылдары Қазақ КСР ҒА М.О.Әуезов атындағы Әдебиет және өнер институтында ғылыми қызметкер, 1974–1994 жж. М.Әуезов атындағы Шымкент педагогика институтында доцент, профессор, кафедра меңгерушісі (1977), факультет деканы (1982), институт проректоры (1989), институт ректоры (1992), 1994 жылдан Шығыстану институты ректорының кеңесшісі әрі 1996 жылдан М.Әуезов атындағы Оңтүстік Қазақстан мемлекеттік университетінің профессоры, кафедра меңгерушісі болып қызмет істейді. 1999 жылдан Қазақ-Кувейт университетінің ректоры.

Қазақ әдебиеті мен мәдениетінің, білім мен ғылымның келелі мәселелері, оның басты өкілдерінің шығармашылығы жайлы, М.Әуезовтің әдеби, ғылыми-сын мұрасы туралы зерттеу еңбектері ғылыми басылымдар мен бұқаралық ақпарат құралдарында үнемі жарияланып тұрды.

«Әуезовтің шығармашылығына байланысты библиографиялық көрсеткіш» (А., «Ғылым», 1972, авторлар ұжымы), «Мұхтар Әуезов – әдебиет сыншысы» (А., «Ғылым», 1973), «Уақыт және қаламгер» (А., «Жазушы», 1974, авторлар ұжымы), «Ата қоныс» (Ш., «Жібек жолы», 1992, С.Жолдасовпен бірге), «Мұхтартанудың беймәлім беттері» (А., «Қазақстан», 1997), «Ұстаздық ұлағат» (А., 2001) монографиялары жарық көрген. Филология ғылымдарының докторы, профессор, Гуманитарлық Ғылым академиясының академигі.

1987 жылы Қазақстан Республикасы Жоғарғы Кеңесінің Құрмет Грамотасымен, 2001 жылы «ҚР Тәуелсіздігінің 10 жылдығы» медалімен марапатталған.