Аталық Әбдешұлы

Аталық Әбдешұлы 1945 жылғы 13 қазанда Ақтөбе облысының Байғанин ауданында туған. Қазіргі Әл-Фараби атындағы Қазақ Ұлттық университетін, Алматы жоғары партия мектебін журналистика мамандығы бойынша бітірген.

1976-1990 жылдарда Маңғыстау облыстық телевизиясында аға редактор, облыстық «Маңғыстау» газетінде бөлім меңгерушісі болып істеген.

1991 жылдан қазірге дейін (2024 ж.) Маңғыстау облысы әкімінің аппаратында мемлекеттік тіл аудармашысы-сарапшысы болып істейді.

Облыстың мемлекеттік органдарында іс қағаздарын мемлекеттік тілге көшіруге, қалыптастыруға және қолданылу аясын кеңейтуге лайықты атсалысқан. Қазақстан Журналистер одағының мүшесі.

«Мен де бір қазақ:...», «Іздеген бақты ісімнен», «Жарық дүние жымию үшін де жаралған», «Айдынды аймақ Маңғыстау», «Годы и судьбы», «Адамдар. Қадамдар...», «Екі ауыз сөз», «Пайымдарым» атты кітаптары жарық көрген. Бір топ өлеңдері «Маңғыстау ақын-жазушыларының» 50 томдығына енгізілген. Қазақстан Республикасы Президентінің Алғыс хатымен (2001 ж.); Қазақстан Республикасы Президентінің Алғыс хатымен (2019ж.) марапатталған.

«Үздік аудармашы» Тұңғыш республикалық конкурсының жүлдегері – жоғары кәсіби шеберлігі үшін Қазақстан Республикасы Мәдениет министрінің Дипломына; «Туымыз – Тәуелсіздік» фестивалінде режиссер І. Сәрсенғалиевтың «Бойтұмар» және «Бойтұмардың оралуы» көркем фильмдері үшін (І.Сәрсенғалиевпен бірге) 1 дәрежелі Дипломына, «Каспий – достық теңізі» Халықаралық фестивалінің Дипломына ие болған.

Мемлекеттік тілді дамытуға қосқан лайықты үлесі және адал еңбегі үшін Мемлекеттік награда – «Ерен еңбегі үшін» медалімен және көптеген мерекелік медалдармен наградталған.